LAOAG CITY – Nasakit ti nakem ni Mrs. Fely Clemente, residente iti Brgy. 34-B Gabu Norte ditoy siudad ti Laoag, kalpasan a pinungot-pungot ni Barangay Kagawad Janice Racacho iti sango ti pagtaengan na.
Iti pannakiuman ti Bombo Radyo Laoag kenni Clemente, namunganay daytoy gapu iti kalapati no sadinno nga adda dagiti napan iti bubungan ti pagtaengan da.
Inpagarup na a ti anak na ti napan iti bubungan ti pagtaengan no sadino a makaisturbo iti panagturog iti malem.
Inungtan ni Clemente ti anak na ngem naamuan na a saan nga isu iti napan iti bubungan ti pagtaengan da ngem ketdi ti kaanakan na.
Dita met a nagsao-sao ni Racacho iti likod ti pagtaengan bayat ti panagisalapay ni Clemente kadagiti nalabaan na.
Gapu ti pungtot ni Racacho ket intudtudo na dagiti agina agingga a napungotpungot na ti ina.
Kabayatanna, inadmitir ni Clemente a saan nga agun-uni ti kagawad no adda dagiti ubbing iti bubungan ti pagtaengan no sadino amakaisturbo dagitoy iti alas-dos wenno alas-tres ti malem nga oras met iti panagturog.
Damo laeng a napasamak kenni Clemente daytoy gapu kadagiti ubbing nga agpatpatayab ti kalapati.
Kuna na nga awan ti sabalin a problema da iti kagawad malaksid iti napasamak kenkuana.
Desidido ni Clemente a nga ireklamo ti kagawad a nangpungot kenkuana nupay nagpadenpensar kenkuana daytoy.
Innayon ti ina nga adda ti sumaruno a sumon kadakuada intono sumaruno a lawas.
Iti sabali a bangir, kinumpirmaran ni Barangay Chairman Rodel Legaspi nga agkabagyan da Barangay Kagawad Janice Racacho kenni Mrs. Fely Clemente ken agkarruba dagitoy.
Kuna na a pudno a napasamak ti pannakapungot ni Clemente babaen kenni Racacho gapu iti kalapati a patpatayaben dagiti ubbing bayat nga adda da iti bubungan ti pagtaengan.
Segun kenni Legaspi, babaen iti palawag ti kagawad a napikar daytoy gapu ta matmaturog idinto a makaringgor ti ubing nga immuli iti bubungan.
Inbatad na a nadlaw ti kagawad nga arig a saan a dumdumngeg ti ubing uray mabagbagaan daytoy babaen iti ina na.
Kuna ni Legaspi nga inadmitir ni Clemente a saan a maan-anawa ti anak na ngem ti inpetteng na nga isyu ket iti pannakapungot daytoy.
