LAOAG CITY – Naarestar ti maysa nga indibidual babaen ti Entrapment Operation nga inwayat dagiti otoridad gapu iti panagtakaw na iti ili ti Banna.
Ti suspek ket agtawen ti 50, naasawaan, awanan trabaho ken residente iti Brgy. Bengcag ditoy cuidad ti Laoag, idinto a ti biktima na ket agtawen met laeng ti 50 ken residente iti Brgy. Bomitog iti ili ti Banna.
Basar iti imbestigasion, inlako ti suspek iti tinakaw na a lugan iti biktima iti gatad a 120,000 a pisos, ngem kalpasan ti sumagmamano nga aldaw, nagkiddaw manen ti suspek iti nayun a bayad a 30,000 a pisos iti biktima.
Iti baet daytoy, kiniddaw met ti biktima dagiti documention ti lugan ket ditoy naamuan na sabali ti nakarehistro a nagan ti nasao a lugan.
Insigida met a tinawagan ti biktima iti makinkua iti lugan a residente iti Brgy. Bil-Loca, iti siudad ti Batac ken inreport da kadagiti otoridad.
Gapu iti daytoy, nangiwayat dagiti otoridad ti Entrapment Operation a nangitunda ti pannaka tiliw ti suspek.
Malaksid iti kaso na a panagtakaw, nakumpiskar pay dagiti otoridad iti suspek ti maysa a sachet ti maipagarup a shabu, dua a pedaso ti one thousand peso bill, maysa a unit ti Motoposh 155 a kurong-kurong, ken maysa a Toyota Avanza.
Iti agdama maisagagana dagiti kasapulan a dokumento a maipila kontra iti suspek.
