LAOAG CITY – Pimmusay ti maysa nga indibdual a nagmaneho iti motorsiklo iti Airport Avenue partikular iti sango ti maararmid a dakkel a mall asideg ti Brgy. 51-B Nangalisan ditoy ciudad.
Nabigbig ti biktima nga agtawen ti 26, awanan asawa, lalaki, addaan iti Professional Driver’s license, ken residente iti Brgy. 7-A ditoy ciudad ti Laoag.
Basar iti imbestigasion nga inwayat ti Philippine National Police ditoy ciudad, agdaldaliasat ti biktima iti Airport Avenue nga agturong iti laud idinto a napukaw ti kontrol ti driver iti handle bar ti minanehona a motorsiklo gapu iti napigsa a tudo ken nagalis a kalsada ket nadungparna ti kongkreto a poste ti street light ti nasao a barangay.
Gapu iti daytoy, naitapuak ti biktima iti tallo (3) a metro ti kaadayona manipud iti pannakadungparna.
Mainaig iti daytoy, nagsagaba ti sugat ti biktima iti ulo ken nagduduma a paset ti bagi idinto a dagos a naitaray daytoy iti ospital ngem naideklara a dead on arrival babaen iti attending Physician-na.
Kabayatanna, ti nadakamat a motorsiklo ket adda iti kustodiar ti Philippine National Police ditoy siudad ti Laoag tapnu maammoan ti cost of repair, para iti dokumentasion ken umno a disposision.
