LAOAG CITY – Inpakaammo ni P/Lt.Col. Jerome Wangki, Hepe ti Batac City Police Station nga insuko ti maysa nga indibidual nga agtawen ti 20 a nag-post iti social media kadagiti otoridad dagiti lakona a paputok nga awan ti lisensiana.
Segun kenkuana, apaman a naawatda ti report ket insigida a nangaramidda ti tignay tapno maammoan ti pakabigbigan ti nasao a nag-post iti online.
Inbatadna a nakikoordinar met a naimbag ti maseknan no sadinno a boluntariona nga insuko iti pulisia dagiti ilaklakona a paputok iti online kas ti five star.
Inlawlawagna a basar iti pannakisarsaritana iti nasao nga indibidual ket maipagarup nga ipalpalakoda laeng kenkuana dagiti paputok.
Innayonna nga adda ti maysa a nairekord a firecracker related incident iti siudad ti Batac kabayatan ti panangsarabo ti baro a tawen.
