LAOAG CITY – Naalarma dagiti opisyal iti Brgy. Puyupuyan iti ili ti Pasuquin iti panaglibas ti maysa a residente a nakaquarantine.
Segun ken ni Brgy. Kagawad Ignacio Jun Caalim iti nasao a barangay, arig a kaaw-awid na laeng idi rabii manipod iti panagpatrolya da idi ta adda ti nangtawag kenkuana seknan iti panaglibas ti nagpositibo iti virus.
Inbatad na a dita a dagus a nagpatulong kadagiti kameng ti PNP-Pasuquin tapno mabirok ti naglibas nga indibidual.
Kuna na a babaen iti alisto a panagresponde dagiti pulis ket nabirokanda ti maseknan nga indibidual iti sango ti maysa a convenience store iti nasao nga ili.
Inpakaammo na a dita a dagus a nakemmeg ti maseknan nga indibidual ken naipan iti barangay quarantine facilty.
Immuna iti daytoy, kuna ni Caalim nga inusar ti nagpositibo iti virus iti panaglibas na ti maysa a motorsiklo.
Inpasigurado ti kagawad nga iti agdama ket naiget ti pannakabantay da iti nakaquarantine nga indibidual tapno saan a maulit ti kapada nga insidente.
