LAOAG CITY – Natay kalpasan a nagbekkel ti maysa a lalaki ditoy ciudad ti Laoag.
Segun kenni Barangay Chairman Rowel Domingo iti Barangay Cabungaan-B ditoy ciudad ti Laoag, nakita ti kaanakan ti biktima a nakabitin iti kulluob da usar iti tali.
Inbatad na a ti ammo ti kaanakan ti biktima ket nakatakder laeng daytoy ngem idi inasitgan na ken nakita na a nakabitinen daytoy isut gapo na a nagkiddaw ti tulong.
Inlawlawag na nga inpadas ti kaanakan ti biktima a maysa a nurse nga i-revive ti uliteg na ngem awan ti pulso na.
Nupay kasta, intaray da latta ti nadakamat a biktima iti ospital.
Kuna pay ti kapitan a ti ammo ti miembro ti pamilya ti biktima ket matmaturog laeng iti kwarto na.
Kabayatanna, inbatad ti kapitan nga awan met ti ammo da a rason no apay a kastoy ti inaramid ti biktima.
