LAOAG CITY – Kinumpirmaran ni Dra. Heidi Marita Albano, ti Municipal Health Officer iti ili ti Vintar nga adda ti pimmusay nga indibidual a positibo iti antigen test iti Barangay Lubnac.
Segun kenni Albano, dua nga aldaw sakbay a pimmusay ti pasyente ket maulaw ken nasakit ti susuot na.
Gapo iti daytoy, dimmalan iti antigen test ken nagpositibo daytoy ken naipakammo kadakuada isut gapo na nga in-quarantine da ti pasyente iti pagtaengan da.
Inlawlawag na nga idi kalman ket dimmalan iti RT-PCR test ngem idi alas-onse iti rabiin ket naipakammo kadakuada a pimmusayen daytoy.
Kalpasan daytoy ket inkoordenar na iti MDRRMO ken iti sanitary inspector tapno mailawlawag ti pannakaidulin ti bangkay ti pimmusay kas panangsurot iti DOH Memorandum Circular 158.
Dinakamat na a masapol a maitabon wenno ma-cremate ti indibidual iti uneg ti 12 nga aldaw gapo ta protocol daytoy kadagiti kumpirmado wenno suspect a covid positive.
Kuna ni Albano a mangiyuswat da ti random antigen test dagiti agarop 21 nga indibidual iti nasao a ligason tapno madeterminar ti positibo wenno saan.
Mainaig iti daytoy, inbatad ni Albano nga iti napalabas a dua nga aldaw, nakadeterminar da ti 17 a positibo iti rapid antigen test ken uppat kadagitoy ti saan pay a dimmalan iti swab, ken adda pay ti tallo a nagositibo rason nga umaboten iti pito ti manamnama a dumalan iti RT-PCR test ken agpapada dagitoy nga addaan ti sintomas.
Kabayatanna, inlawlawag pay ni Albano a ti pannakaipan iti MECQ ti ili da ket saan a tapno barikadan ti lugar da no diket tapno maipababa da ti kaso ken malimitan ti garaw dagiti tattao.
Nagpanawagan pay kadagiti kailyan na a sumurot iti health protocols tapno saan a maakaran iti covid-19.
