LAOAG CITY – Na-comatose ti maysa nga indibidual kalpasan ti panagdinnungpar ti dua a motorsiklo iti Vintar Road iti paset ti Barangay 54-A, Lagui-Sail ditoy ciudad ti Laoag.
Basar iti immunan a panagimbestigar ti Philippine National Police ditoy ciudad ti Laoag, bayat iti panagpapa-amyanan ti maysa a motorsiklo nga adda ti lubbon na ket bigla a naglikko nga agpakannigid a nangitunda ti panagdinnungpar da iti maysa pay a motorsiklo nga agpaabagatan met iti dayta a gundaway.
Rumrumuar a saan unay a napigsa ti impact ti panagdinnungpar ti dua a motorsiklo ngem naitupar ti ulo ti backrider iti iggem na a tangke.
Naitaray ti biktima iti Governor Roque Ablan Senior Memorial Hospital (GRASMH) ditoy ciudad ti Laoag ngem agpapan maisursurat daytoy a damag ket nagtalinaed paylaeng a comatose daytoy.
Kabayatanna, saan pay a nakapagsarita ti dua a partido mainaig iti nasao a pasamak.
