LAOAG CITY – Inpakaamu ni P/Capt. Dondon Dumalag ti Deputy Chief of Police iti Philippine National Police iti ili ti Pasuquin nga adda iti impluwensya ti nasanger ti maysa nga indibidual a nagpappaputok ti paltog kabayatan ti panagkasangay ni Barangay Kapitan Cessar Olnagan iti Barangay Dilavo iti ili ti Pasuquin.
Segun ken Dumalag, agarup ala una ti parbangon idi nagpaputok iti maminlima a daras ti suspek nga agtawen ti 28, mekaniko, ken residente iti Brgy. Caruan, iti isu met laeng nga ili.
Kunana a ti suspek ket nagatendar ken naginom iti nasao a pasken agingga a nabartek daytoy ken maipagarup nga adda ti kinakontra na.
Nabigbig met ti paltog nga inusar ti suspek a maysa nga 9mm ken saan a nakarehistro daytoy idinto a naduktalan a ti suspek ket awan ti permit to carry firearms-na isu a saan a mabalin nga agikut daytoy iti paltog.
Inlawlawag ni Dumalag a ni mismo Barangay Kapitan Olnagan ti naka-isurrenderan ti paltog ken iti agdama ket adda daytoyen iti biang ti pulisya.
Pinasingkedan na pay nga awan met ti nagbalin a riri iti nagbaetan ti suspek ken ti nasao a Kapitan.
Kabayatanna, daytoy ti umuna a gundaway nga inaramid ti suspek ti panagpappaputok ken awan met aniaman a criminal records na.
