LAOAG CITY – Inpakammo ni Police Major Joseph Tayaban, ti chief of police iti ili ti Badoc a tiniliw da ti maysa nga indibidual kalpasan a tinarayan na ti checkpoint.
Segun kenni Tayaban, bayat ti pannakaiyuswat ti Comelec checkpoint ket sinada da ti maysa a tricycle ken saan a nagsardeng no sadinno nagin-innayad agingga a pinataray na nga immadayo kadagiti pulis.
Gapo iti daytoy, kinamat dagiti pulis iti 150 agingga ti 200 a metro ti kaadayo na ken idi nakamatan da ket kinomprontar da daytoy ngem arogante ti panagsungbat na ken pinagsaw-an na ti dakes dagiti pulis rason a pinosasan da.
Inlawlawag na a binurok da ti drivers license daytoy ngem awan ti maipakita na ken awan pulos ti dokumento a naipakita nga isu ti rason no apay nga intarayan na ti checkpoint.
Inpetteng na a gapo iti daytoy ket pilaan da ti kaso a panaglabsing iti Artice 151 wenno ti disobedience to a person in authority.
Naamoan nga adda ti commitment order ken maipan iti Bureau of Jail Management and Penology iti ciudad ti Batac.
Innayon na a narekomendaran ti tallo ribo a pisos a piyansa ken ti citation ticket gapo iti kaawan ti lisensya na nga agmaneho.
Kabayatanna, kunana nga agserbi daytoy nga adal kadagiti amin nga agiturturong ti nagduduma a klase ti behikulo.
