LAOAG CITY – Maysa ti nasugsugatan iti panagdinnungpar ti maysa nga SUV montero ken kotse iti bypass road a sakupen ti Brgy. Vira ditoy siudad ti Laoag.
Inbatad ni Pol. Staff Sgt. Alecson Rosal, ti duty desk officer ti PNP traffic division nga iti pangimbestigarda, agpaabagatan ti SUV idi ta kellaat nga immagaw iti linya ti kotse agpapaamianan.
Gapu iti daytoy, nakuppit ti akin kannigid a parte ti kotse idinto a nakuppit ti sango ti SUV ken nagasgasan ti akin kannawan a parte daytoy.
Nagsagaba ti driver ti kotse ti sugat iti nagduduma a paset ti bagi na ken naawanan ti puot idinto saan a naan-ano ti nangiturong ti SUV.
Dagus a naitaray iti GRASMH ti driver ti kotse ngem naiyakar met laeng iti MMMH&MC iti siudad ti Batac para iti naan-anay a pannakataming na.
Naamoan nga adda iti impluwensya ti nasanger ti driver ti kotse idi napasamak ti insidente ken naggapo iti ili ti Sarrat idinto a naggapo met iti ili ti Pasuquin ti SUV.
