LAOAG CITY – Natay ti maysa nga indibidual iti outbreak ti Guillain-Barre syndrome (GBS) iti Maharashtra state idiay India.
Ti Guillain-Barre syndrome ket maysa a neurological disease a mangitunda ti panagpipikel, panagkapsot ken panagsakit ti bagi.
Basar iti health officials, ngumatngato ti kaso daytoy iti nasao nga estado.
Adda ti pakabuklan a 101 a kaso ti Guillain-Barre syndrome ti naipadamag a kaadduan ket manipud iti Pune City.
Manipud iti Solapur City ti nairekord a pimmusay idinto nga adda ti 16 a pasiente ti naka-ventilator.
Nangipatuloden ti seven-member team ti gobierno tapno tingitingen ti sitwasion iti Pune kageddan ti outbreak.
Iti nasao a kondision ti Guillain-Barre syndrome, apektaranna ti immune system ti bagi dagiti nerve a mangitunda ti paralysis ken pannakatay.
Kaadduan kadagiti sintomas ket rummuar sumagmamano nga aldaw wenno lawas kalpasan ti viral wenno bacterial infection.
Naammoan a ti posible a rason ket ti narugit a mainom a danom iti lugar.
