LAOAG CITY – Natay ti maysa nga indibidual idinto a 23 ti naispal kalpasan ti malfunction ti elevator iti saanen a maus-usar a pagminasan iti balitok idiay Colorado.
Dua a grupo ti 12 a tattao ti nagpasiar iti Mollie Kathleen Gold Mine idiay Cripple Creek, maysa a pribado a venue dagiti turista, idi kellaat a nag-malfunction ti elevator no sadinno a na-stranded ti maysa a grupo iti uneg ti innem nga oras.
Iti umuna a grupo, maysa ti natay idinto a dagiti nabati a 11 a turista, pakairamanan ti dua nga ubbing ket naispal manipud iti pagminasan, uppat kadagitoy ti addaan iti minor injuries.
Ti maikadua a grupo a buklen ti 12 nga indibidual ket naipit iti underground a paset ti pagminasan ngem kalpasan ti sumagmamano nga oras ket balligi a naispal dagitoy.
Kuna dagiti opisial a ti lift a bumaba iti pagminasan ti balitok ket addaan iti mechanical issue agarup 500 feet kauneg na, a nangpataud iti nakaro a peggad para kadagiti nakipaset.
