LAOAG CITY – Kinumpirmaran ni P/Cpt Emerito Mamenta, Chief of Police iti Philippine National Police iti ili ti Banna a pimmusay ti maysa nga indibidual idinto a lima met ti nadangran kalpasan a natnag iti derraas ti elf truck a naglugan da iti paset ti Brgy. Valenciano iti ili ti Banna.
Segun kenkuana, innem nga indibidual dagiti nakalugan iti elf truck ken agpapada dagitoy a residente iti Dingras, Ilocos Norte.
Kinunana nga agawid koman dagiti biktima manipud iti kataltalonan gapu ta naggapas dagitoy idi napasamak ti insidente.
Basar iti imbestigasion dagiti otoridad, kabayatan a dumaldalyasat ti elf truck iti kurbaan a paset iti nasao a lugar ket napukawan daytoy ti preno a nangitunda ti pannakatennagda iti derraas.
Gapu iti daytoy, naitaray dagiti lima nga indibidual a nasugatan iti Mariano Marcos Memorial Hospital iti ciudad ti Batac idinto a naideklara a dead on arrival ti maysa kadakuada a naitaray iti Doña Josefa Edralin Marcos District Hospital iti ili ti Marcos babaen iti attending physician a ni Dr. Erwin Locsin.
Kabayatanna, rumrummuar a ti nakapasamakan ti aksidente ket accident prone area gapu ta agkurba daytoy ken nasipnget.
