LAOAG CITY – Kinumpirmaran ti state media ti United Arab Emirates (UAE) a maysa nga indibidual ti natay iti Abu Dhabi, kalpasan a simmubbot ti Iran ti missile attack iti amin a Naval base ti Estados Unidos iti Gulf Arab states.
Saan metten a nangiparuk-at ti nayun a detalye ti United Arab Emirates mainaig iti pannakatay ti maysa nga indibidual.
Inbatad dagiti otoridad iti Kuwait, Qatar, United Arab Emirates ken Jordan nga agpada nga adda ti presensya ti militar ti Estados Unidos a na-intercept da dagiti missile sakbay a nangitunda ti dakdakkel a perdisyon.
Iti maysa nga statement, inadmitir ti Islamic Revolutionary Guard Corps (IRGC) ti panagatake no sadinno nga inbatad da a maipagarop a tinamaan da dagiti “All occupied teritories” ti base militar ti U.S. iti rehiyon.
Kabayatanna, kinumpirmaran ti Bahrain a binomba met ida ti nasao a grupo ken natamaan ti maysa a service center ti U.S. Fifth Fleet.
Makita dagiti nagwaras a video ti napuskol nga asok iti asideg ti kabaybayan kabayatan ti pannakangngeg ti napigsa a sirens iti lugar.
Iti met Abu Dhabi, nangiparuk-at ti emergency alert dagiti otoridad kadagiti residente nga agturong kadagiti kaasitgan a natalged a pasdek ken liklikan ti agtalinaed kadagiti tawa gapu iti pangta ti missile.
