LAOAG CITY – Inyistorya ni Engr. Maria Kaye Eco iti 2nd Engineering District iti Department of Public Works and Highways (DPWH) ti pannakapukaw ti wallet na iti uneg ti maysa a pampasahero a bus nga addaan ti rota Laoag-Pagudpud.
Segun kenkuana, bayat ti panagur-uray da ti pasahero ket bimmaba manipod iti uneg ti bus ngem nagsubli met laeng idi dandanin mapunno ti lugan.
Kuna na nga idi nakasubli ti uneg ti bus ket adda ti maysa grupo nga agkakaaribuso ken adda ti maysa a babai a nakitugaw kenkuana.
Inbatad na nga idi kauten na ti wallet na iti uneg ti bag na ket awanen.
Innayon na a bayat ti panagsapsapol na ket adda ti maysa a babai iti sango a manguk-ukag ti bagna ken inbaga na a saan koma nga agpabpabasol idinto a ti kaabay na a babai ket timmakder ken dinamag na ti nagan na.
Engr. Maria Kaye Eco
Inpetteng na a gapu ta saanna a kayat ti riri ket bimmaba lattan iti bus ken plano na koma ti agpaukag kadagiti gamit dagiti pada na a pasahero ngem nagbain.
Atapen ni Eco nga iti mismo uneg ti bus ti nakapukawan na ti wallet na a naglaon kadagiti napapateg nga IDs, ATM cards, passbook, sangaribo a cash ken dadduma pay.
Inpakaammo na nga insearch na dagiti nakaluganan na ket naamoan a kailian na dagitoy ken naduktalan na pay nga addan dagiti immuna a napukpukawan iti nasao a terminal.
Kabayatanna, Inbatad ni Mr. Pedro Mamuad, presidente iti Operators and Drivers Association dagiti buses nga addaan ti rota a Laoag-Pagudpud nga awan pay ti napukpukawan ti nasao a terminal malaksid ti pannakapukaw ti wallet ni Engr. Maria Kaye Eco.
Kinumpirmaran ni Mamuad nga arigna adda aminen CCTV dagiti buses nga addaan ti rota a Laoag-Pagudpud.
Nupay kasta, kuna na a saanna a maipasigurado no adda ti CCTV ti bus a nakapukawan ni Eco ti wallet na.
Kuna na a kasarita na ti dispatcher ken amwen na no adda ti CCTV ti nasao a bus ket paukag na tapno maamoan no siasinno ti nangala ti wallet ni Eco.
