LAOAG CITY – Tiniliw dagiti kameng ti PNP-Laoag ti maysa a civil engineer ti DPWH-1st Engineering District gapo iti panagikot na ti paltog ken bala iti Barangay Talingaan ditoy ciudad.
Nabigbig daytoy a ni Engr. Albert Martin y Bumanglag, agtawen ti 37 ken residente iti Purok Dos, Barangay Tangid ditoy ciudad.
Basar iti impormasyon, namunganay ti pannakatiliw ni Martin kalpasan nga adda ti naawat ti pulis a mensahe manipud iti kalive-in daytoy gapo iti maipagarop a panangpilit na a makinaig kenkuana ken pinangtaan na pay ti babai paltogan na daytoy.
Iti panagresponde dagiti otoridad ket nakumpiskar da manipud iti suspek ti sling bag a nakaipanan ti maysa a kalibre 45 a paltog nga addaan ti pito a bala, uppat a cellphone, wallet ken dadduma pay.
Iti agdama ket nagtalinaed iti kustudiyar ti PNP-Laoag ti nadakamat nga inhinyero.
Kabayatanna, kuna ni Police Lt. Col. Rafael Lero, ti chief of police ti PNP-Laoag a ti paltog a naala kenni Martin ket isu ti maipagarop nga us-usaren na a pangbutbuteng iti live in partner na.
Dinakamat na a ti paltog ket maipan iti PNP Crime Laboratory para iti ballisitic examination tapno madeterminar no siasinno ti pudno nga akin-kukua iti daytoy ken maduktalan no naus-usar iti krimen.
Inbatad na a basar iti panagimbestigar da ket awan met pay ti naduktalan da a ti suspek ket karaman iti krimen wenno iligal nga aktibidad.
Kunana nga awan ti nagan ni Martin iti listaan dagiti otorisado nga agikot ti paltog ngem urayen da pay ti kumpirmasyon manipud iti Camp Crame
Kinumpiramran met ni Lero a nagbabawi ti babai a mangipila ti reklamo ngem ti PNP ket pilaan da ti kaso a panaglabsing iti RA 10591 ti nasao nga inhinyero.
