LAOAG CITY – Naarestar ti maysa nga inhinyero a maibilang kas Street Level Individual iti naisayangkat nga anti-illegal drug buy-bust operation iti paset ti Barangay 56-B, Bacsil ditoy ciudad ti Laoag.
Nabigbig daytoy a ni Engr. Filemon Conception y Agorilla, agtawen ti 43, awanan ti asawa ken residente iti Barangay 23, Manayon iti ili ti Sarrat.
Kinemmeg a dagus dagiti kameng ti Philippine National Police ni Engr. Conception kalpasan a naglako ti maysa a sachet a naglaon ti maipagarop a shabu iti nagpammarang a police poseur-buyer.
Nakumpiskar pay ken ni Engr. Conception ti 12 a sachet a naglaon ti maipagarop a shabu, 3 ribo a pisos a nausar iti operasyon, motorsiklo na a Yamaha NMAX, ken adda pay ti lima a bala ti mapapati a 9mm a paltog.
Naglikudan amin ti inhinyero dagiti naala nga ebidensya kontra kenkuana, ngem inadmitir na nga agus-usar ti illegal a droga aglalo no agaramid ti plano.
Naamoan nga agturong koma ni Conception iti ili ti Vintar tapno mapan makibonding iti barkada na idi tiliwen dagiti otoridad iti nadakamat a lugar.
Ni Conception ket dati nga empleado iti Lokal a Gobierno iti ili ti Sarrat no sadinno a nagserbi daytoy sipud 2010 agingga iti 2012.
Kalpasan iti panagikkat na iti lokal a gobierno iti ili ti Sarrat ket napan iti maysa a construction firm iti ili ti Solsona kas site engineer.
