LAOAG CITY – Inbatad ni P/Cpt Kester Arellano, chief of police ti Philippine National Police iti ili ti Pinili a balligi a naarestar ti maysa nga inidibidual babaen iti naisayangkat nga Anti-Illegal Drug Buy-Bust Operation iti Brgy. Upon iti nadakamat nga ili.
Binibigna ti suspek nga agtawen 54, aglaklako iti karne ti baboy iti tiendaan, kas Street Level Individual ken residente iti nadakamat a barangay.
Nakumpiskar iti 6 mapapati a shabu manipud iti suspek ken maysa a maipagarup a shabu nga inlakona iti polis a nagpammarang kas poseur buyer.
Innayonna a nabayag a momonitorenda ti nasao a suspek no sadinno naammuan nga adda ti pakanaiganna kadagiti immunan natiliw ti Philippine National Police,
Kabayatanna, manarimaan ti panangikompirmar dagiti otoridad no agus-usar ti suspek iti illegal a droga.
Nupay kasta, kunana a nagkedked ti suspek a mangipaay iti naan-anay nga impormasion seknan iti nadakamat a banag.
Kabayatanna, nagtalinaed ti suspek iti kustodiar ti Philippine National Police iti ili ti Pinili ken sumango daytoy iti kaso a panaglabsing iti Republic Act 9165.
