LAOAG CITY – Immapela ti tulong ni Elena Gudalena iti Barangay Poblacion Uno, Currimao, Ilocos Norte para ti kabsat na nga OFW a ni Analiza Ponce nga agdama a naka-confine iti Intensive Care Unit (ICU) iti ICU university Malaya Medical Center idiay Kuala Lumpur, Malaysia.
Segun ken ni Gudalena, nasurok a lima a tawenen ti kabsat na iti nasao a pagilyan ken naudi a nakasarita da ket idi disyembre itay napan a tawen.
Inbatad na a naglibas ti kabsat na iti amo na gapu ta saan da a swel-sweldoan ken sumursurot laeng idi iti catering.
Segun pay kenkuana, tunggal makasarita da idi ti kabsat na ket kanayun na nga ibaga a madi ti bagbagi na ken adda ti highblood na isut gapuna a kasapulan na ti ag-maintenance.
Innayon na a saan pulos a nadakdakamat ni Ponce nga adda ti rikriknaen na a madi iti buksit na.
Gapu ti daytoy, inbatad ni Gudalena a masapol a makapan a dagus ti maysa kadagiti kakabsat da idiay Malaysia gapu ta ti laeng kayat a pangibagaan dagiti doctor ti pudno a sakit ni Ponce ket dagiti kameng ti pamilya na.
Malaksid ti daytoy, kasapulan pay ti pammalubos ti pamilya ni Ponce sakbay a maopera.
Naamoan a nagkiddaw metten ti pamilya ni Ponce iti DSWD ken iti mayor idiay ili ti Currimao.
