LAOAG CITY – Mangnamnama ni Mr. Demetrio Bong Rafanan, OFW idiay Italy ken tubo idiay probinsya ti Ilocos Sur a maipaay ti umno a proteksyon para kadagiti ginasot a ribo nga Overseas Filipino Workers iti nagduduma a pagilyan.
Reaksyon daytoy ni Rafanan kalpasan ti maikatlo nga State of the Nation Address (SONA) ni Presidente Rodrigo Duterte idi kalman.
Segun kenni Rafanan, uray adda dagiti sarita ni Presidente Duterte nga ina-angaw ket urayen na latta a matungpal ti inkari na.
Mainaig iti daytoy, inbatad na a kas maysa nga OFW nga agipatpaulod ti kwarta ditoy Pilipinas ket apektado da iti pannakaipatungpal ti TRAIN law.
Kunana nga ummuna pay laeng a phase ti TRAIN law ket narigaten para kadagiti adda ditoy pagilyan isut gapo na a kayat na a makita dagiti agpanpanday-linteg ti sitwasyon dagiti marigrigat a Pilipino.
