LAOAG CITY – Kinumpirmaran ni Mr. Dick Garcia, ti mangidadaulo iti Bannatiran Association of Hongkong nga adda ti natiliw a maysa nga OFW a lalaki idiay Hongkong kabayatan ti isaysayangkat a tignay protesta dagiti chinese nationals iti nadakamat a pagilyan.
Segun ken ni Garcia, ti saan pay a nainaganan nga OFW ket agtrabtrabaho iti Disneyland Resort Hotel kas entertainer idiay Hongkong.
Inbatad na a ginammatan dagiti pulis ti nasao nga OFW a nairana laeng nga adda iti lugar gapu ta nakabado ken nakapantalon ti nangisit.
Inpagunam-gunam ti konsulado ti Pilipinas idiay Hongkong a liklikan pay laeng ti agbado ti puraw ken nangisit, ken saan nga agturong kadagiti lugar a pakaisaysayangkatan ti tignay protesta gapu ta delikado.
Kabayatanna, kuna ni Garcia a bimmaba ti 10 a porsiento ti tourist arrival iti nasao a pagilyan sipud idi rimsua ti riribok iti lugar.
Innayon na nga adda pay ti nakanselar a 230 a flights a rumuar ken sumrek gapu ti mapaspasamak a riot iti nasao a pagilyan.
Iti agdama, kuna ni Garcia a nagtalinaed ti OFW iti kustodyar dagiti otoridad ken inikkat ti konsulada ti Pilipinas ti tallo nga abogado na.
Innayon na a no awan ti maipila a kaso iti uneg ti 48 nga oras ket waya-wayaan dan ti maseknan.
