LAOAG CITY – Naarestar ti maysa nga online seller kalpasan ti inwayat dagiti otoridad nga anti illegal drug buy bust operation iti Barangay Sta. Maria iti ili ti Vintar.
Nabigbig ti daytoy a ni Rommel Huxley Foronda, agtawen ti 45, balo, online seller, ken residente iti Barangay 4 iti ili ti Vintar.
Natiliw ti suspek kalpasan a maipagarup a naglako ti maysa nga heat sealed transparent plastic sachet a naglaon ti maatap a shabu nga agdagsen ti 1.1 a gramo nga agbalor ti PhP 6,500 iti maysa a pulis a nagpammarang kas poseur-buyer.
Malaksid iti daytoy, nakumpiskar pay manipud iti suspek dagiti non-drug evidence, kas iti kuarta, selpon, ken maysa a karton ti vape.
Segun iti Vintar Municipal Police Station, ti suspek ket maibilang nga Street Level Individual.
Iti agdama, nagtalinaed ti suspek iti pagbalodan ken sumangsango iti kaso a panaglabsing iti Republic Act No. 9165 wenno ti Comprehensive Dangerous Drugs Act of 2002.
