LAOAG CITY – Nagkamang iti Sanguniang Panlungsod ti maysa a residente a nabigbig a Angelica Garcia iti Barangay Raraburan ditoy ciudad ti Laoag gapu iti maipagarop a saan a panangited ni Barangay Kapitan Elmer Maulit iti barangay clearance kenkuana.
Segun ken Garcia, usarenna ti barangay clearance tapno makapagrehistro iti business permit.
Impakaammo na pay a pinangtaan ni Maulit ni Garcia ken ti ina na nga ikkan da ti yellow ribbon ti tiangi da tapno saan da a makapaglako.
Kunana nga adda pay ti panagturong ni Maulit iti Business Permit and Liscensing Office tapno ibaga a saan ta nga iisyuan ti clearance ni Garcia.
Naammuan a ti tiangi ni Garcia ket naglukat idi napan a tawen iti bulan ti Oktubre.
Ti reklamo ni Garcia ket nai-endorso iti biang ni ABC President RB Ablan tapno mimbestigaran ti naan-anay a napasamak.
Kabayatanna, inadmitir ni Barangay Kapitan Elmer Maulit iti barangay Raraburan ditoy ciudad ti Laoag a saan na nga inikkan ti barangay clearance ni Angelica Garcia para iti panagrehistro na iti business permit iti sari-sari store na.
Segun ken ni Maulit, ado dagiti violation ni Garcia rason no apay a saan na a maikkan manen iti barangay clearance daytoy.
Maysa ditoy ti maipagarop a pinagpapainom da iti nasanger iti dis oras ti rabii, ken kinaawan ti linsensya iti las-od ti mano a bulan a pinagop-operar da.
Impakaammo ti Barangay Kapitan a dimmawat ni Garcia ti barangay clearance idi bulan ti Setiembre idi napan a tawen, ngem saan na met nga inkaso ti panangilakad kadagiti dokumento na tapno makaala ti business permit.
Kasta pay a dinawat ti kapitan ti balakad iti biang ni Mrs. Janet Duarte iti local government operations officer ditoy ciudad, no sadinno nga imbatad ni Duarte nga ikkan na latta ti barangay clearance ngem masapol nga agsurat ni Garcia ti promise sorry note.
Inadmitir met ni Garcia ti alegasyon nga agpapainom isuna iti dis oras ti rabii, ngem imbatad na kaadduan kadagiti agiinom ket annak ti opisyal.
Mangnamnama ni Garcia a makapagsasarita da a nasayaat kadagiti barangay opisyal nangruna ken ni barangay kapitan Maulit ken ni Barangay Kagawad Charlie Pammit iti daytoy nga isyu.
