LAOAG CITY – Saan a nalawag ken ni Ms. Mary Santiago, maysa a Returning Overseas Filipino (ROF) ken residente iti Brgy. Ferdinand iti ili ti Marcos ti nakapaayan na kalpasan a simmangpet ditoy probinsya.
Daytoy ket gapu ta saan a pulos a naballaagan sakbay a naipan iti maysa nga hotel a maus-usar a quarantine facility ditoy siudad ti Laoag.
Segun ken ni Santiago, tallo da a simmangpet nga OFW a taga ili ti Marcos idi Pebrero 21.
Inbatadna nga immuna a nasukon iti border control iti ili Badoc dagiti dua a kakadua na idi lunes, Pebrero 22 ken naud-udi isuna ken naideretso daytoy iti maysa nga hotel.
Gapu iti daytoy, kuna na a nakigtot gapu ta namnamaen na nga iti metlaeng ili ti Marcos ti pakaipanan na a dumalan iti quarantine.
Immuna iti daytoy, inpakaamo ni Santiago a naipakaamo kenkuana nga adda ti maipagarup a kinalugananna a nagpositibo iti covid-19 rason a saan a naideretso iti ili ti Marcos.
Nu pay kasta, kuna na a basar iti panagdamamag na kadagiti otoridad iti border control iti ili ti Badoc, awan ti nakalugananna a positibo iti virus.
Mainaig iti daytoy, inbunannag ni Santiago a saan a makumikon iti virus ngem ketdi iti sitwasyon na ti agdama kangrunaan na ti manamnama a magastos na iti panagquarantine na iti hotel.
Kabayatanna, agpapan a maisursurat daytoy a damag ket awan pay ti palawag ti RHU-Marcos seknan iti nasao a banag.
