LAOAG CITY – Kinumpirmaran ni Vice Mayor Joseph de Lara iti Solsona, Ilocos Norte ti panagturong dagiti kameng ti Philippine Veterans Affairs office (PVAO) ti ili da tapno personal nga iyawat da ti pammadayaw ti kayong da a maysa a retirado nga US Navy.
Inlawlawag ni de Lara a ti kayong na a ni Retired Lt. Commander Dan Chandler ti US Navy ket isu laengen ti kakaisuna a sibibiag a nakadwa idi ni General Douglas Mc Arthur.
Segun ti bise mayor, inpaayan ti PVAO ti Philippine Campaign Medal ni Chandler kas panangbigbig ti gobierno ti Pilipinas ti maysa a gangannaet a soldado a dakkel ti naitulong na ditoy pagilyan.
Ni Chandler, agtawen ti 90 ket maysa kadagiti gangannaet a nakipagpaset ti gubat kontra kadagiti nangsakop idi ti Pilipinas ken naasawa na ti inauna a kabsat a babai ti bise mayor.
Inbatad ni de Lara a kalpasan a na-research ti PVAO aa sibibiag pay laeng ken adda ni Chandler ti nasao nga ili ket personal a nagturong dagiti maseknan ti balay na iti Barangay Laureta ti nasao nga ili tapno ikkan da ti pammadayaw.
Kuna ti bise mayor a mismo a ni Historical Division Chief Retired Brigadier General Restituto L. Aguilar iti PVAO ti nangiyawat ti pammadayaw ken ni Chandler.
Innayon na nga immuna iti daytoy ket addan ti dua a consul general manipod iti US embassy a napan nangbisita ken ni Chandler.
