LAOAG CITY – Responsibilidad dagiti aglaklako iti merkado publiko iti ili ti San Nicolas a mangdalos iti pwesto da ken mangipan ti basura da iti lokasyon a naituding a pakaikabilan na.
Daytoy ti inbatad ni Mr. Totsi Ilaga, ti Market Master iti ili ti San Nicolas kalpasan a nagkamang iti Bombo Radyo Laoag nga aglaklako tapno ireklamo ti utility personnel a ni Mr. Arnel Coloma a maipagarup a nangpabain kenkuana kea saan na nga innala ti basura na.
Segun iti Market master, adda ti protocol a sursuruten da no sadinno nga amin a market vendors nasken a dagitoy ti mangdalos iti sirok ti pwesto da.
Inpetteng na a ti pwesto ti nagreklamo ket isu ti karugitan ken kababain no adda ti bisita gapo ta isuna pay a mismo ti masungad no sumrek iti tiendaan.
Inpalgak na nga adda pay ti gundaway a pinanawan na a nakarugrugit ti pwesto na.
Inlawlawag na nga adda iti protocol a masapol nga adda ti tallo a pagbasuraan ti tunggal aglaklako sakbay a maipaay ti lisensya dagitoy.
Kunana a maysa a pagbasuraan para kadagiti marunot, maysa iti saan a marunot ken maysa met para kadagiti mabali pay a ma-recycle.
Nupay kasta, inpetteng na a ti mismo nagreklamo ti saan a mangsursurot iti daytoy gapo ta paglalauken na ti basura na.
Naamoan a dagiti aglaklako ti mangipan ti mismo a basura da iti likod ti merkado publiko nga isu ti kolektaren dagiti utility sakbay a maipan iti dump site.
Mainaig iti daytoy, kunana a saan a nagkurang dagiti ulitity gapo ta ar-aramiden da met ti responsibilidad da ken no pudno a madi ti aramid dagitoy ket nabayag kuman nga ado ti reklamo kontra kadagitoy.
