LAOAG CITY – Balligi a natiliw ti maysa a lalaki iti ili ti Pinili babaen iti inyuswat a drug buy bust operation dagiti kameng ti Philippine Drug Enforcement Agency (PDEA) ditoy probinsya.
Nabigbig ti subject ti operasyon a ni LJ Estabillo y Aganon, agtawen ti 42, naasawan, x-ray technician ken residente iti Brgy. Salanap iti ili ti Pinili.
Segun ken ni Agent Harry Cariño iti PDEA, nakumpiskar iti suspek ti nailako iti nagpammarang a posuer-buyer a maysa a sachet ti maatap a shabu ken buy bust money.
Kabayatanna, kuna ni Cariño a kabayatan a maiyus-uswat ti operasyon ket inbelleng ti suspek iti kamaisan ti coin purse na.
Nu pay kasta, inbatad na a babaen iti body worn camera ket naduktalan ti inaramid ti suspek ken dita a naduktalan a naglaon ti tallo a shachet ti maatap a shabu ti coin purse pakairamanan ti sumagmamano a drug paraphernalia.
Naamoan a ni Estabillo ket High Value Target Personality ditoy probinsya ken addaan ti iligal nga operasyon saan laeng iti Ilocos Norte ngem ketdi iti kabangibang a probinsya.
Iti agdama ket maisagsaganan ti kaso a panagsalungasing iti RA 9165 wenno Comprehensive Dangerous Drugs Act of 2002 kontra iti suspek.
