LAOAG CITY – Inadmitir ni Rev. Father Randy Manicap Sr. iti Parish of St. Anne idiay ili ti Piddig, Ilocos Norte a naawanan ti ganas a nagbuya ken arig na saan nga ammo dagiti rakurak ni Presidente Rodrigo Duterte iti maikatlo nga State of the Nation Address (SONA) na.
Daytoy ket gapo ti kadagiti sumagmamano a natratar ni Presidente Duterte iti SONA na kas iti endo ken ti panagminas.
Segun kenni Manicap, saan na nga ammo no nangalaan ti presidente ti bilang dagiti nai-regular iti trabaho gapo ta ado pay laeng dagiti agral-rally seknan ti kontraktwalisasyon.
Mainaig iti daytoy, kuna ni Manicap nga inur-uray na a dakamaten ni Presidente Duterte ti peace talks gapo ta agingga a saan a masolbar ti ramot ti susik ket saan a magun-od ti kapya.
Inlawlawag ni Manicap a maysa kadagiti adbokasiya ti simbaan ket ti pannakaituloy ti saritaan ti kapya.
Kabayatanna, kwinestyunaran ni Manicap ti rakurak ti presidente a concern daytoy iti biag dagiti tattao gapo ta saan a mailimed nga adon dagiti indibidwal a napapatay iti kampanya na kontra iti iligal a droga.
Innayon na a no ikkan na ti grado ti SONA ti presidente manipud 1 agingga iti 5 ket ikkan na daytoy ti 2 a grado.
