LAOAG CITY – Inlawlawag dagiti agassawa ti reklamo da kontra ti Florida Bus lines gapu ti asok dagiti pampasahero a bus a nakaparking iti asideg ti balay da ti Brgy. 6 ditoy siudad ti Laoag.
Segun kenni Mr. Aldrin Alonzo, nagpaiblotter dan iti PNP ken nakikoordinar ti asawa na kenni Bise Mayor Michael Fariñas seknan ti reklamo da.
Nupay kasta, nakisarita ni Dr. Melvin Manuel kenkuana mainaig ti pannakaipawil a maipan ti “no parking sign” iti sango ti balay da.
Inadmitir ni Alonzo a nagipan da ti “no parking sign” iti sango ti balay da tapno maliklikan ti panagparking dagiti bus ngem sinita ti Barangay chairman Marlon Blanco.
Kuna na nga inung-ungtan ti kapitan ti asawa na gapu ti panangikabil da ti no parking sign.
Gapu iti daytoy, nagreklamo dan iti PNP ken DILG ti nagbalin nga ugali ti kapitan.
Mainaig iti daytoy, marigatan a makaanges ni Mrs. Alonzo gapu ti asok nga iruruwar dagiti bus a nakaparada iti asideg ti balay da.
Innayon ni Mrs. Alonzo nga adu pay a karruba na ti agangkit gapu ti nalanglang-ab da nga asok manipud kadagiti nakaandar a bus.
Agingga ita ket saan pay a nalpas ti problema mainaig ti asok a maang-angot da manipud kadagiti nakaandar nga bus ti Florida Lines.
Daytoy ti inbatad ni Mrs. Alonzo.
Nupay kasta, saan da unayen nga agreklamo gapu ta pinasingkedan ni Barangay Chairman Marlon Blanco nga addan iti maikadua a pannakaibasa ti city ordinance iti Sangguniang Panlungsod seknan ti pannakaiparit ti panagparking dagiti bus ti nasao a kompanya.
