LAOAG CITY – Saanen a naidanon pay a sibibiag ti maysa a Pastor ti maysa a sekta ti relihiyon iti hospital kalpasan a nadisgrasya iti paset ti ili ti Pasuquin.
Nabigbig daytoy a ni May John Tecson, agtawen ti 22 Pastor ti 7th day Adventist, tubo iti San Jacinto, Pangasinan ngem agin-indeg idiay Poblacion iti ili ti Pagupud.
Basar iti imbestigasyon ti PNP-Pasuquin, nakalugan ti motorsiklo ni Tecson ket bayat nga agpapaabagatan a direskiyon iti paset ti Nat’l Highway paset ti Bgy. Nagsanga iti nasao nga ili, nakasinnabat na ti maysa nga 18 wheeler truck nga inturong ni Arnold Uberita agtawen ti 45 ken agindeg idiay Mabuttal East, Ballesteros, Cagayan.
Rumrumuar a maipagarup nga immagaw ti linya ni Tecson a rason iti nakidinungparan iti nasao a truck.
Nagsagaba ti biktima kadagiti sugat kadagiti nagduduma a paset ti bagina nangnangruna iti ulo na iti laksid nga adda helmet na.
Iti agdama ket adda iti kustodyar ti PNP ti suspek pangiyur-urayan ti maipila a reklamo kontra kenkuana.
