LAOAG CITY – Inistorya ni Mr. Joel Corpuz iti Barangay 27 ditoy ciudad ti Laoag ti kapadasan na kalpasan a maipagarop a nabiktima met ni Mr. Vladimir Magayano, ti maak-akusaran nga agrenta ti lugan ken ilako na.
Segun kenni Corpuz, nagrenta ti lugan ni Magayano iti uneg laeng ti maysa nga aldaw ngem kalpasan daytoy ket saan nan a matawagan isut gapo na a naalarma ken nadiskubre na a maysa daytoy a maestro ken binirok na daytoy.
Inlawlawag na nga inbati ni Magayano ti ID na ngem saan na latta a natawagan isut gapo na a kinsarita na dagiti nagannak daytoy tapno isubli na gapo ta no saan ket ipakammo na iti LTO.
Inbatad na a kalpasan ti tallo nga aldaw ket insubli ni Magayano ti lugan ken nangi-issue ti tseke a pagbayad na kuma.
Kalpasan daytoy, kuna ni Corpuz a nadamag na pay a tallo pay a lugan ti napan na innala ken insalda na dagitoy agingga a natiliw iti ili ti Paoay.
Mainaig iti daytoy, plano ni Corpuz ken dagiti kakadwa na a nabiktima met a dumatag met iti PNP tapno magipila met ti reklamo kontra kenni Magayano tapno awanen ti maluko daytoy.
Ni Corpuz ket isu ti maikadwa a naamoan ti Bombo Radyo a nagreklamo kontra kenni Magayano.
