LAOAG CITY – Maysa pay nga high-ranking official ti Overseas Workers Welfare Administration (OWWA) ti na-dismiss gapu iti maipagarop a papel na iti kontrobersyal a P1.4-billion land acquisition deal a rason ti naan-anay a pannakaikkat ni dati nga Administrator Arnell Ignacio.
Segun ken ni Department of Migrant Workers (DMW) Secretary Hans Leo Cacdac, maim-imbestigar met ni dati a Deputy Administrator Emma Sinclair a simmaruno a naikkat iti pwesto kalpasan a rimuar ti kontrobersyal a land deal.
Kuna na a gagem ti maiwaywayat nga imbestigasyon ket tapno maestablisar dagiti kaso a maipila kontra kadagiti dua nga OWWA executive a maipagarop a kangrunaan a karaman iti nasao a proyekto.
Immunan nga inlawlawag ni Sec. Cacdac a ti dua ket naikkat gapu iti maipagarop a maanomalya a transakyon ken saan da a basta nagresign iti pwesto.
