LAOAG CITY – Inbatad ni Bombo International Correspondent Manny Pascua a maysa a pinay ti natay kalpasan a nauram idiay Hawaii.
Segun ken ni Pascua, ti saanen a nainaganan a biktima ket agtawen iti 55, taga Sinait, Ilocos Sur ken agdama nga agnanaed idiay Lihue Kauai.
Iti nakalap nga impormasyon ni Pascua, bayat nga aglutluto ti biktima ket immapoy ti paglutlutwan na ket ginandat na nga iruwar ngem saanna a nalukatan ti ridaw ken pannakaibukbuk kenkuana ti manteka a nagresulta ti pannakauram na.
Naitaray ti biktima iti ospital ngem saanen a nasalbar ti biagna gapu kadagiti sinagaba na a nakana a sugat.
Saan pay nga ammo ti pamilya ti biktima no iyawid da ti bangkay na ditoy pagilyan wenno idiay da laengen Hawaii nga itabon.
