LAOAG CITY – Namindua nga inaramiden ni PO3 Rodante Castillo a pangtaan ti Pamilya Carreon iti brgy 3 Sta Barbara iti ili a Sarrat.
Daytoy ti kinumpirmaran ni Pchief Insp. Roldan Suitos hepe ti nasao nga ili.
Kuna ni Suitos nga iti umuna a gundaway ket pinangtaan na ti nasao a pamilya ken ti kaudian ket ti panangtutok na ti paltog.
Inbatad na a naaramid ni Castillo ti nagpangta gapu ta adda patartarimaan na a lugan iti shop ti pamilya Carreon kasta metten ti mekaniko da.
Segun kenni Suitos, nakainom ni Castillo idi inaramid na ti nasao a banag.
Ni PO3 Castillo ket residente iti Bgry 24 iti ili a Sarrat ngenm nakabase iti PNP Vintar.
Kabayatanna, inlawlawag ni Mr. Isias Carreon, agtagikua ti talyer iti Brgy 3 Sarrat ti napasamak a panagtutok ti paltog ni PO3 Castillo.
Kuna na a narigat ti piyesa ti inpatarimaan ni Castillo a lugan na a Volkswagen model 68 rason a nagpaorder da.
Inbatad na nga agarup 3 a bulan sakbay a simmangpet ti piyesa ken idi insalpak da ti piyesa ket isu metten ti panagatap ni Castillo a linoko da.
Segun kenni Carreon, ti ammo ni Castillo ket sabali ti nakaigatangan ti kuarta na idinto nga adda met ti resibo ti ginatang da a piyesa iti matartarimaan a lugan na.
Inpakaammo ni Carreon a nalaos ti buteng ti asawa na a ni Marissa idi intotok ni Castillo ti paltog na.
Iti agdama, nagperma dan ti affidavit para ti ipila da a reklamo kontra kenni Castillo.
Awan pay ti reaksiyon ni PO3 Castillo iti daytoy a pasamak.
