LAOAG CITY – Balligi a natiliw ti suspek a lalaki iti napasamak a panagtatakaw iti JTC Supermarket idiay ciudad ti Batac.
Nabigbig daytoy a ni William Salmasan y Baldomir, agtawen ti 63, naasawaan, maysa a mannalon ken residente iti Barangay Lumbaan-Bicbica iti ili ti Pinili.
Naamoan a ti innala ni Salmasan manipud iti pagtagilakoan ket ti maysa a botelya ti cider vinegar nga agbalor ti 254 a pisos.
Immuna iti daytoy, nagreport iti PNP-Batac da Leo Agcaoili y Rodriguez, agtawen ti 35, Aide Supervisor ken residente iti Brgy. Bongtolan, Vigan City, Ilocos Sur ken ni Marciano Uy y Regalado, agtawen ti 34, OIC Security guard ken residente iti Brgy. Cabaritan, Sto. Domingo, Ilocos Sur.
Segun ti palawag dagiti dua, rumwar kuman ni Salmasan manipud ti supermarket ngem kinapkapan ni Uy daytoy rason a nakaduktalan na nga adda ti inbulsana iti pantalon na a botelya ti suka.
Kiniddaw pay ti gwardya ti resibo ti nasao a produkto ngem awan ti naipakita ti nasao a suspek.
Iti agdama ket maisagsaganan ti kaso a panagtatakaw kontra kenni Salmasan.
