LAOAG CITY – Inpakaammo ni PLt. Rudy James Jacalne, ti hepe ti PNP-Piddig a balligi ti pannakaiyuswat ti anti illegal gambling operation iti Sitio Dos, Brgy. 11-Lagandit iti nasao nga ili.
Kuna ni Jacalne nga uppat nga indibidual dagiti nakemmeg ken isuda ket ni Felecino Salvador, Gerald Aguiran, Frederick taylan Antonio kenni Alex Gorchano, agpapada a residente iti nasao nga ili.
Inpakaammo ti hepe a ti pannakatiliw dagiti suspek ket kalpasan ti dua nga aldaw a pannakasipsiput ti iligal a panagsusugal da iti maysa a minatayan.
Inbatad na a nakumpiskar ti 300 a pisos a pusta, maysa a set ti baraha, maysa a white mono block a lamisaan ken puraw a table cloth pakairamanan ti dua a monoblock a tugaw.
Immuna iti daytoy, kuna ni Jacalne a maysa ti nakalibas kabayatan ti pannakaiyuswat ti operasyon.
Manamnama a sumango dagiti suspek ti kaso a panaglabsing ti PD 1602 kas naamyendaran iti RA 9287 wenno ti illegal gambling.
Kabayatanna, kuna ni Jacalne nga arig a nadismaya kabayatan ti operasyon gapu ta adda dagiti naimatangan da nga opisyal iti minatayan ngem inpetteng dagitoy nga awan ti ammo da iti iligal nga aktibidad ti kabarangayanda.
