LAOAG CITY – Pimmusay ti maysa nangiturong ti tricycle idinto a natukkol ti saka ti pasahero na kalpasan ti napasamak a desgrasya iti national highway a paset ti Brgy. Mabusag iti ili ti Badoc.
Nabigbig dagiti biktima nga isuda Richard Pacunayen, agtawen ti 33 ken residente iti Brgy. Lang-ayan Currimao ken maysa nga adda iti umno nga edad, residente iti Bgry. Gaang iti nasao met laeng nga ili.
Basar iti imbestigasyon ti PNP-Badoc, na-overshoot ti tricycle ti kurbaan a paset ti kalsada bayat nga agpapaamianan a direksyon.
Gapu iti daytoy, nagderderetso a naidungpar ti tricycle iti poste nu sadino a naitama ti driver idinto a naipurwak iti kaadayo nga agarup lima a metro ti pasahero.
Dagus a pimmusay ti tricycle driver gapu iti nakana a sugat a sinagaba na iti ulo idinto a natukkol ti saka ti pasahero.
Mainaig iti daytoy, kuna ni PMaj. Joseph Tayaban, ti hepe ti PNP-Badoc nga uppat ti makitkita da a rason iti napasamak a desgraysa.
Inbatad na a daytoy ket pakairamanan ti napaspas a taray ti trcicyle, adda iti impluwensya ti nasanger dagiti biktima, nasipnget ti dalan ken agtudtudo idi napasamak ti insidente.
Iti agdama, nagtalinaed iti ospital ti pasahero para iti naan-anay a pannakataming na.
