LAOAG CITY – Maysa ti natay ken maysa ti natukkolan ti saka iti panagdinnungpar ti maysa a motorsiklo ken pick-up iti paset ti Brgy. 55-A Barit ditoy siudad ti Laoag.
Segun ken ni PSSgt. Mark Briones, ti duty desk officer ti Laoag Traffic Division, dua a babbai dagiti naglugan iti motorsiklo ken residente dagitoy iti nadakamat a barangay idinto a taga ili iti li ti Bangui dagiti dua a naglugan iti pick-up.
Inbatad na a basar iti panagimbestigarda, agpaabagatan ti pick-up idi ta nag-overtake ket dita a nasabat na ti motorsiko nga agturong iti amianan.
Gapu iti daytoy, kuna na a nagdinnungpar dagiti dua a behikulo ken gapu iti kapigsa ti impact ket naipurwak dagiti nakalugan iti motorsiklo.
Kuna ni Briones a natukkol ti aki kannigid a saka ti nailubbon iti motorsiklo idinto a nakana a sugat ti sinagaba ti nangiturong ti behikulo ken pimmusay bayat a matamtaming iti ospital.
Immunan nga inpakaammo ni Briones nga agawid koma dagiti naglugan iti motorsiklo iti Brgy. Barit idinto a naggapo iti ili Pasuquin dagiti naglugan iti pick-up idi napasamak ti insidente.
Iti agdama ket agtultuloy ti imbestigasyon dagiti otoridad iti nasao nga insidente.
