LAOAG CITY – Naideklara a dead on arrival ti maysa a lalaki kalpasan iti panagdinnungpar ti van ken kotse iti Brgy. 20, San Jose iti ili ti Sarrat.
Segun ken ni PMaj. Hermy Ancheta, Hepe ti Philippine National Police iti ili ti Sarrat, nabigbig ti driver ti kotse a Toyota Yari nga agtawen ti 25, awanan asawa, construction worker ken residente ti Brgy. 54 ditoy Siudad ti Laoag idinto a nabigbig met ti nangiturong ti Van a Toyota Hi Ace nga agtawen ti 31, awanan asawa ken residente iti ili ti Solsona.
Inbatadna a basar iti naisayangkat nga imbestigasion, bayat a dumaldalyasat ti van nga agturong nga agpa-abagatan ket dita a kellaat a dimmungpar ti naka-kotse nga agturong met nga agpa-amianan.
Inlawlawagna a rumrummuar iti imbestigasion a ti nangiturong ti kotse ti akin basol gapu ta maipagarup a napukawan daytoy ti kontrol ti manibela a nangitunda ti panagdinnungparda iti van.
Gapu iti impact ti desgrasia, napuruan ti lalaki a maysa kadagiti tallo a pasahero a kadua ti driver ti kotse gapu iti nakana a sugat a sinagabana a dagus met a naitaray iti Dingras District Hospital ngem naideklara a dead on arrival.
Mainaig iti daytoy, kuna ni PCpl Jayson Pascual, Imbestigador iti nasao a desgrasia, basar iti pannakaipadalan dagiti nakalugan iti kotse ti liquor test ket positibo dagitoy nga adda ti impluwensiya ti nasanger.
Inbagana a naggapu iti pagmeryendaan iti Brgy. Sta. Rosa iti ili ti Sarrat dagiti nakalugan iti kotse idinto a kagapgapu met iti Laoag International Airport dagiti nakalugan iti van a napan nangsukon ti kabagianda a nagawid manipod iti ballasiw-taaw.
Innayonna nga iti agdamag nagtalinaed iti kustudyar ti Philippine National Police iti ili ti Sarrat dagiti maseknan a nakalugan iti van kabayatan a maiyur-uray ti desision ti pamilya ti pimmusay a biktima.
Kabayatanna, manamnama a sumango ti driver ti van ti Resulting in Homicide and Damage to Property.
