LAOAG CITY – Natay ti maysa a babai ken sangapulo dagiti nasugatan iti panangdarusdos ti maysa a kotse kadagiti tallo a behikulo a sarsarunwen na iti Sarat Bridge, bisinidad ti Barangay 20 iti ili ti Sarrat.
Nabigbig daytoy a ni Magdalena Susa, addaan ti umno a tawen, ken residente iti Barangay Root iti ili ti Dingras.
Iti impormasyon manipud iti Philippine National Police iti ili ti Sarrat, karaman iti desgrasya ti kurong-kurong nga inturong ni Ruberto Baradi y Binavente, agtawen ti 39, naasawaan, ken dagiti nakalugan ket ti agtawen ti 18 ken dua pay a lallaki a menor de edad nga agtawen ti 14 ken 15 ken agpapada a residente iti Barangay Lydia iti ili ti Marcos.
Maysa pay ket ti tricycle nga inturong ni Michael Susa y Casugo, agtawen ti 41, ken dagiti pasaheros na ket isuda Magdalena Susa ken Janet Ballesteros, agtawen ti 44, naasawaan ken residente amin dagitoy iti Barangay Root iti ili ti Dingras.
Karaman pay ti motorsiklo nga inturong ni Simplicio Andres y Rafael, agtawen ti 38 ken dagiti lubbon na ket dagiti menor de edad nga agtawen ti 14 ken 12, agpapada a residente iti Barangay Bacsil South ditoy ciudad ti Laoag idinto a ti kotse ket inturong ni Alexis Santos y Mejia, agtawen ti 36 ken residente iti Barangay 5 Mangitayag Piddig.
Basar iti imbestigasyon ti Philippine National Police iti ili ti Sarrat, agsasaruno nga agpadaya ti kurong-kurong, tricycle ken motorsiklo idi dinarusdos ti kotse nga adda iti likudan dagitoy.
Gapo iti daytoy, nagsagaba ti sugat amin dagiti karaman iti desgrasya ken naitaray dagitoy iti Dingras District Hospital ngem naideklara a pimmusay ni Magdalena Susa.
Naamoan a da Simplicio ken dagiti dua a kinalubbon na ket naiyakar iti Mariano Marcos Memorial Hospital and Medical Center iti ciudad ti Batac para iti naan-anay a pannakataming da.
Kabayatanna, agtultuloy met ti naun-uneg nga imbestigasyon ti Philippine National Police iti ili ti Sarrat seknan iti nasao a desgrasya.
