LAOAG CITY – Natay ti maysa idinto a dua dagiti nasugatan iti napasamak a desgrasya iti Brgy. San Simeon iti ili a Currimao.
Basar iti imbestigasyon ti PNP Currimao, bayat nga agpapaabagatan a direksyon ti tricycle nga inturong ni Bryan Esposo, 24, awanan asawa ken residente ti Brgy. Maglaoi iti nasao nga ili ket kellaat a naglock ti sidewheel ti tricycle rason a napukawan ti kontrol ti manibela na rason ti pannakaidungpar na.
Gapu iti daytoy, nairamraman ti nakalubbon a da Ronnie Buyat, 30, awanan asawa, security guard ken ni Danilo Cayabyab Jr., 31, awanan asawa, dumptruck driver ken agpada a residente iti nasao a barangay.
Nagsagaba da Buyat ken Esposo ti sugat iti sumagmamano a paset ti bagi da idinto a naideklara a dead on arrival ni Cayabyab.
Nadadael met ti sumagmamano a paset ti tricycle ken saan pay a madeterminar ti balor ti nadadael.
