LAOAG CITY – Maysa ti natay ken maysa ti kritikal ti kasasaad na kalpasan ti napasamak a desgrasya iti bypass road, bisinidad ti Barangay 55-C, Vira ditoy ciudad ti Laoag.
Nabigbig ti natay a ni Richard Antonio, agtawen ti 23, awanan ti asawa ken residente iti Brgy. Santa Asuncion, iti ili ti San Nicolas idinto a ti kritikal ti kondisyon na ket ni Oliver Agnes, agtawen ti 33 ken residente iti Brgy 24. San Roque iti ili ti Sarrat.
Segun iti Philippine National Police ditoy ciudad, ni Agnes ket aggapo iti amyanan ken agturong iti abagatan idi immagaw iti linya isut gapo na a nadungpar na ni Antonio nga agpaamayanan met iti nasao a lugar.
Gapo iti daytoy, nagsagaba ti sugat iti nagduduma a paset ti bagi dagiti dua a driver.
Naitaray dagiti dua a driver iti Governor Roque Ablan Sr. Memorial Hospital ditoy ciudad ti Laoag ngem naideklara a dead on arrival ni Antonio idinto a ni Agnes ket naiyakar iti Mariano Marcos Memorial Hospital and Medical Center iti ciudad ti Batac ken agpapan maisursurat ti damag ket adda iti kritikal a kondisyon.
Inbatad ti pulisya a dagiti dua a driver ket agpada a nakainom ti nasanger idi napasamak ti desgrasya. Iti agdama, agtultuloy pay laeng ti imbestigasyon dagiti otoridad seknan iti nasao nga insidente.
