LAOAG CITY – Maysa ti pimmusay ken maysa iti nasugsugatan iti panagdinnungpar iti kurong-kurong ken motorsiklo iti Laoag-Suba road a sakupen iti Sitio 2 Sungadan, Brgy. 40 Balatong iti ciudad ti Laoag.
Binigbig ni Pol. Chief Master Sgt. Eric Bumagat, ti hepe ti Philippine National Traffic Division ditoy siudad ti Laoag iti ti biktima a ni Joshua Marayag y Espiritu, agtawen 23, tubo ti Binguang San Pablo, Isabela ngem agdama nga agnanaed iti Brgy. 45 Tangid ditoy ciudad.
Inturong met ni Aldrin Facistol, agtawen 19, awanan ti asawa, maysa nga estudyante ken residente iti Brgy, 28 San Bernabe ditoy ciudad ti Laoag ti kurong-kurong nga Honda TMX 155.
Basar iti imbestigasyon dagiti otoridad, agpada nga agpaamianan dagiti dua a behikulo iti Laoag-Suba road idi immovertake ti nakamotorsiklo ngem kellaat met nga nagpakannigid iti kurong kurong.
Gapo iti daytoy ket napasamak ti desgrasya a rason ti pannakaipurwak ni Marayag iti kaadayo a 24 a metro ken nagsagaba ti nakana a sugat.
Dagus met a naitaray iti ospital iti Gov. Roque Ablan Senior Memorial Hospital ditoy ciudad ngem pimmusay ti biktima.
