LAOAG CITY – Natay ti maysa a lalaki ken nasugatan ti maysa a babai kalpasan ti napasamak a panagtagbat ken pammagkong iti Barangay Zamboanga ditoy ciudad ti Laoag.
Nabigbig ti natay a ni Elpidio Dumrique y Pascual, agtawen ti 77, naasawaan idinto a ti nasugatan ket ni Raquel Waterman, agtawen ti 46, naasawaan idinto a ti suspek ket ni Manuel Dumrique y Pascual, agtawen ti 75, naasawaan, agpapada dagitoy a residente iti nasao a barangay.
Ti pimmusay a biktima a ni Elpidio ket kabsat a mismo ti suspek a ni Manuel.
Iti inisyal nga imbestigasyon dagiti otoridad, ummuna a napasamak ti panagtagbat no sadinno mayat nga agsel-cellphone ni Raquel Waterman ket kellaat lattan a tinagbat ni Manuel a rason ti nakasugatan ti bukot na.
Kalpasan daytoy ket naglibas ti suspek idinto a ti babai a biktima ket naitaray iti ospital ken nagbalin nga out-patient.
Segun pay iti report, kalpasan ti panagtagbat ket nakangeg ni Elvira Cahot Dumrique, asawa ni Elpidio, nga adda ti makatagari iti ruwar ti pagtaengan da rason a dagus a rimuar.
Ditoy metten a nakita na ti asawa na a ni Elpidio a nakadasay ken dara-dara gapo iti panangbagko-bagkong ti suspek a ni Manuel.
Rumrumuar a gandaten pay ti suspek a tagbaten ni Elvira ngem nagsao daytoy ti “Manong Manuel, Manong Manuel, Apay? Natay la ngaruden, usto na kadin” ken rimuar metten dagiti dadduma a karruba da.
Dagus a naglibas ti suspek ken agpapan ita ket saan pay a natiliw ti suspek.
Naamoan a ti motibo ti insidente ket gapo iti datin a suspek iti nagbaetan ti suspek ken biktima.
Agtultuloy met ti imbestigasyon dagiti otoridad seknan iti nasao nga insidente no sadinno manamnama a maipila ti kaso a parricide ken frustrated murder.
Kabayatanna, kuna ni Barangay Chairman Elmer Lorenzo iti nasao a barangay a nakita na a nagsagaba ti sugat iti tengnged, ima, barukong ti biktima.
Ti met makitkita ti kapitan no apay a tinagbat ti suspek ni Waterman ket gapo iti dati met laeng a susik idinto a ti panangbagkong na iti kabsat na a ni Elpidio ket gapo iti saan da met a panagkinnawatan panggep iti daga.
