LAOAG CITY – Maysa ti natay ken maysa ti nasugatan kalpasan a nagdinnungpar ti kurong-kurong ken motorsiklo iti paset ti Brgy. Poblacion 2 iti ili ti Pasuquin.
Basar iti imbestigasyon dagiti otoridad, agpapabagatan a direksiyon ti motorsiklo nga inturong ti agtawen ti 46, naasawaan ken residente iti Brgy. 31 Corocor iti ili ti Bacarra idinto nga agpapamianan ti kurongkurong nga inturong ti pimmusay a maysa nga air-condition technician, ken residente iti Brgy. 3 Poblacion iti ili ti Pasuquin.
Kabayatan ti panagdalyasat dagiti dua iti nadakamat a kalsada, kellat a nag-overtake ti motorsiklo iti sarsarunuen na a pick-up ket dita a nadungpar na ti kurongkurong a kinasinnabat na.
Gapu iti daytoy, naipurwar ti driver ti kurongkurong rason a nagsagaba ti nakana a sugat iti ulo idinto a natukkol ti maysa a saka ti nangiturong ti motorsiklo.
Naitaray iti ospital ti driver ti kurongkurong ngem naideklarar a dead on arrival.
Rumrumuar nga adda iti impluwensya ti nasanger ti nangiturong ti motorsiklo.
