LAOAG CITY – Maysa ti natay idinto a maysa ti nasugsugatan kalpasan a nakuryente dagitoy bayat nga agtrabtrabaho iti maysa a balay iti Brgy. 32-Corocor iti ili ti Bacarra.
Binigbig ni PLt. Marlon Lorenzo, deputy chief of police iti PNP-Bacarra dagiti biktima nga isuda Sherwin Aringay, agtawen ti 21, naasawaan ken agnanaed iti Brgy. 9- Susugaen iti ili ti Pasuquin kenni Franklin Bartolome, agtawen ti 30, naasawan ken agnanaed iti Brgy. 29 ditoy siudad ti Laoag.
Inbatad na nga iti naiyuswat nga imbestigasyon, immuli iti maikdua a kadsaaran ti maipatpatakder a balay dagiti biktima tapno maguyod ti landok a mausar iti bubungan.
Nu pay kasta, kuna na a saan a naripar dagiti maseknan a naisagid iti waya ti kuryente ti landok ken dita a nakuryente dagitoy.
Kuna na nga agpada a naitaray dagiti biktima iti ospital ngem naideklara a dead on arrival ti ni Aringay idinto a nagasat a nakalasat ni Bartome nga iti agdama ket agtultuloy nga agpapalaing.
Kabayatanna, inpakaammo ni Lorenzo a basar iti innuman na iti agtagikua ti matartaraminaan a balay ken nagkari met daytoy a tumulong kadagiti trabahor na a biktima ti nasao a pannakakuryente.
