LAOAG CITY – Dead on the spot ken nagsisina ti sumagmamano a paset ti bagi ti maysa a lalaki idinto a maysa ti nasugsugatan kalpasan a bimtak ti granada iti Brgy. Poblacion 2 iti ili ti Currimao.
Binigbig ni PLt. Irineo Sibicao Jr., hepe ti PNP-Currimao ti pimmusay a ni Jomar Herera, agtawen ti 30 ken residente iti nasao a barangay idinto a ti nasugsugatan ket ni Rico Santos.
Kuna ni Sibucao a basar iti insyal nga imbestigasyon, inay-ayam ti biktima ti granada bayat nga adda iti kubo.
Inbatad na a bayat ti panangay-ayam na ket kellaat a bimtak daytoy ken napabettakan a mismo ti bagi na.
Naisina ti ramay pakairamanan ti dadduma a paset ken pribado a parte ti bagi na.
Kabayatanna, kuna na nga addan iti nasayaat a kundisyon ti kadua na bayat a nagtalinaed iti Mariano Marcos Memorial Hospital and Medical Center iti siudad ti Batac.
Immunan nga inpakaammo ni Sibucao a teorya ti kapulisan a naikkat ni Herera ti pin ti granada ken idi isubli na daytoy ket dita a bimtak.
Kabayatanna, inbatad ti ama ti biktima a ni Brgy. Kagawad Ramil Herera a naklaat lattan idi nankangngeg ti napigsa a panagbettak.
Kuna na nga inpagarup na nga adda ti lugan a nabettakan ti ligay ngem idi rimuar ket dita metten a nakita na ti anak na a nadasay ken nadigus iti bukod na a dara.
Inbunannag a saan met nga agin-inom ti anakna idi napasamak ti insidente ken awan ti ammo na iti granada nga ikot daytoy.
kabayatanna, inbatad ti ama nga Herera a dati a security guard ti anak na idiay Batangas ngem nagsubli ditoy probinsya tapno adda ti katulunganna.
Naamoan a ti compound a nakapasamakan ti insidente ket kukua ni Vice Mayor Sandra Cabreros iti ili ti Currimao ket ti pamilya Herera ti care taker iti daytoy.
