LAOAG CITY – Agtultuloy ti imbestigasyon ti PNP-Laoag iti panagdinnungpar ti motorsiklo ken tricycle iti Barangay 29 ditoy ciudad ti Laoag a nakatayan ti maysa a lalaki ken nakasugatan dagiti dadduma pay a karaman iti pasamak.
Ti biktima a pimmusay ket agtawen ti 29, awanan ti asawa ken residente iti Barangay Lagui-Sail ditoy ciudad.
Iti imbestigasyon dagiti otoridad, ti motorsiklo ket agturong iti laud idinto a ti tricycle nga inturong ti agtawen ti 45, naasawaan ken residente met laeng iti Barangay Lagui-Sail ken nagluganan dagiti agina a Barangay 52-B Lataag, ket agpadaya.
Rumrumuar nga idi makadanon ti tricycle iti sangwanan ti Barangay Hall iti Barangay 29 ket immovertake iti sarsarunwen na a behikulo ngem ditoy metten a nakadinnungpar na ti motorsiklo.
Gapo iti kapigsa ti impact ti desgrasya ket nagsagaba ti sugat iti nagduduma a paset ti bagi dagiti uppat nga indibidual a karaman iti desgrasya.
Dagus met a naitaray dagiti biktima iti Gov. Roque Ablan Senior Memorial Hospital ditoy ciudad ngem pimmusay ti driver ti motorsiklo bayat a matamtaming.
Manaig iti daytoy, kuna ti driver ti tricycle a ni Mr. Darwin Lawaan a ti ammo na ket mailusot na ti lugan na idi immovertake ken saan da nga agdinnungpar iti motorsiklo.
Segun kenni Lawaan, idi immovertake daytoy ket adayo pay ti motorsiklo ngem napasamak latta ti desgrasya.
Dimmawat met ti pammakawan ni Lawaan iti pamilya ti pimmusay ti biktima ken mangnamnama nga alisto a malaingan dagiti agina.
Kabayatanna, desidido met ti pamilya ti driver ti motorsiklo a mangipila ti reklamo.
Iti agdama, ti driver ti tricycle ket adda iti kustudiyar ti PNP-Laoag.
