LAOAG CITY – Natay ti maysa a babai ken uppat dagiti nasugatan iti panagdinnungpar ti motorsiklo ken tricycle iti sangwanan ti Kapitolyo provincial, bisinidad ti barangay 10 ditoy ciudad ti Laoag.
Nabigbig ti pimmusay a ni Charito Rozqueta Valdez, agtawen ti 42 residente iti Barangay 7, Caunayan iti ciudad ti Batac idinto a dagiti nasugatan ket ti anak na nga agtawen ti 10, Rudy Gappi Ortal, agtawen ti 63, driver ti tricycle ken residente iti Barangay iti ciudad met laeng ti Batac.
Karaman pay kadagiti nasugatan ket dagiti nakalugan ti motorsiklo a da Jesther Ramos Patoc, agtawen ti 24 ken ti inlubbon na nga agtawen ti 19 ken agpada a residente iti Barangay 32-A, Lapaz ditoy ciudad ti Laoag.
Iti imbestigasyon dagiti otoridad, agpadaya ti motorsiklo iti Rizal Street idinto nga agpalaud met ti tricycle agingga a nagdinnungpar dagitoy.
Gapo iti impact ti desgrasya ket naipurwak dagiti nakalugan ti tricycle ken nagsagaba dagiti amin a biktima ti sugat iti nagduduma a paset ti bagi da ken naitaray dagitoy iti Gov. Roque B. Ablan Senior Memorial Hospital ditoy ciudad para iti pannakataming da ngem naideklara a dead on arrival ni Charito.
Kabayatanna, naamoan a dagiti nakalugan ti motorsiklo ket positibo a nakainom ti nasanger.
